Şoltsun kanslerlik yolu
Gerhard Şröderdən 16 il sonra Almaniyada hökumət başçısı – kansler postunu yenidən Sosial Demokrat Partiyasının təmsilçisi tutur.
Şröder 1998-2005-ci illərdə kansler olub. Sonrakı 16 ildə Almaniya hökumətinə Xristian Demokrat İttifaqının nümayəndəsi Angela Merkel başçılıq edib.
Parlament idarə üsullu Almaniyada 2021-ci ilin sentyabrında keçirilmiş seçkidə qüvvələr nisbəti dəyişib: Sosial Demokrat Partiyası 206, Xristian Demokrat və Xristian Sosial ittifaqları alyansı 196, Yaşıllar Partiyası 118, Azad Demokrat Partiyası 92, Almaniya Üçün Alternativ Partiyası 83, Sol Partiya 39 mandat əldə edib, 1 mandat kiçik bölgə partiyasına düşüb.
Noyabrın 24-də üç partiya – Sosial Demokrat Partiyası, Yaşıllar Partiyası və Azad Demokrat Partiyası hökumət qurmaq barədə razılıq əldə edib.
Koalisiya razılaşmasına əsasən, kansler postunu Sosial Demokrat Partiyasından Olaf Şolts götürür. Sosial demokratlar hökumətdə 6 nazir portfeli alır, yaşıllardan 5, azad demokratlardan 4 nazir olur.
Novator.az saytı bildirir ki, Olaf Şolts 1958-ci il iyunun 14-də Almaniyanın Aşağı Saksoniya bölgəsində tacir ailəsində doğulub.
1985-ci ildə Hamburq Universitetini bitirib. Hüquqşünasdır.
Sosial Demokrat Partiyasının sıralarına hələ yuxarı sinif şagirdi olduğu dövrdə – 1975-ci ildə qoşulub.
1982-1988-ci illərdə partiyanın “Gənc sosialistlər” təşkilatının sədr müavini, 1987-1989-cu illərdə Beynəlxalq Sosialist Gənclər İttifaqının vitse-prezidenti olub.
1994-2000-ci illərdə Sosial Demokrat Partiyasının Hamburq təşkilatlarından birinə, 2000-2004-cü və 2009-2018-ci illərdə partiyanın Hamburq təşkilatına rəhbərlik edib.
2001-2019-cu illərdə Sosial Demokrat Partiyasının mərkəzi (federal) idarə heyətinin üzvü olub. 2002-ci ildə partiyanın baş katibi seçilib. 2004-cü ilin fevralında Gerhard Şröder partiya sədri postunu tərk edəndən sonra Olaf Şolts da baş katiblikdən istefa verib.
2009-2019-cu illərdə Sosial Demokrat Partiyası sədrinin müavini olan Olaf Şolts 2018-ci ilin fevral-aprel aylarında həmçinin sədrin səlahiyyətlərini icra edib.
Olaf Şolts 1998-ci ildən bəri bir neçə dəfə Almaniya parlamentinin – Bundestaqın üzvü seçilib. 2005-2007-ci illərdə o, Bundestaqda sosial demokrat fraksiyasının işlər müdiri kimi çalışıb. 2009-2011-ci illərdə fraksiya sədrinin müavini olub.
Olaf Şolts 2001-ci ildə Hamburq hökumətində daxili işlər naziri postunu tutub, 2011-2018-ci illərdə Hamburqun baş naziri olub.
2007-2009-cu illərdə Almaniya hökumətində əmək və sosial məsələlər naziri vəzifəsini tutub.
2018-ci ilin martından Almaniyanın vitse-kansleri və maliyyə naziridir.
Olaf Şoltsun 1998-ci ildə ailə qurduğu həyat yoldaşı Britta Ernst də Sosial Demokrat Partiyasının üzvüdür.
Britta Ernst 2014-2017-ci illərdə Şlezviq-Qolşteyn hökumətində orta təhsil və peşə təhsili məsələləri naziri vəzifəsində çalışıb. 2017-ci ildən Brandenburq hökumətində təhsil, gənclər və idman naziridir.
2017-ci ilin aprelində Olaf Şoltsun “Ümid diyarı” adlı ilk kitabı işıq üzü görüb. Kitabda miqrasiya böhranından, Avropanın gələcəyindən və regional münaqişələrdən bəhs olunur.
