Yeni proqnoz: üç aya Avropada COVİD-dən 700 min adam ölə bilər
Gələn il mart ayının 1-dək Avropada COVİD-19 infeksiyasından ölənlərin sayı 2 milyon 200 min nəfəri ötə bilər. Novator.az saytı “Euronews” kanalına istinadla xəbər verir ki, bu bədbin proqnozu Dünya Səhiyyə Təşkilatının ekspertləri irəli sürüblər.
Hazırda Avropa koronavirusun dördüncü dalğasının episentrində yerləşir. Dünyadakı yoluxmaların 60 faizi bu qitədə qeydə alınır.
Ötən həftə Avropada koronavirusdan gündəlik ölüm sayı 4200 nəfər təşkl edib. Bu, sentyabrdakı göstəricidən iki dəfə çoxdur.
Dünya Səhiyyə Təşkilatının Avropa bölməsi 53 ölkəni əhatə edir. Bura Mərkəzi Asiyanın da bəzi ölkələri daxildir.
İndiyədək həmin 53 ölkədə COVİD-dən 1 milyon 500 min ölüm qeydə alınıb. Gələn il martın 1-dək ölüm sayının 2 milyon 200 min nəfəri ötəcəyi proqnozu üç aydan bir az artıq müddətdə regionda 700 mindən çox əlavə ölümün baş verəcəyi deməkdir.
İki həftə qabaq Dünya Səhiyyə Təşkilatının ekspertləri proqnoz vermişdilər ki, gələn il fevralın 1-dək Avropada COVİD-dən daha 500 min adam ölə bilər.
Hazırda proqnozu martın 1-dək genişləndirən və ölüm sayının 700 min nəfəri ötə biləcəyi haqda xəbərdarlıq edən ekspertlər virusla mübarizə tədbirlərini gücləndirməyə çağırırlar.
2019-cu ilin dekabrında Çində üzə çıxan koronavirus infeksiyası dünyada 5 milyon 186 mindən çox adamın ölümünə səbəb olub.
Mənbə: Euronews.com
