Baydenin niyyəti var
ABŞ prezidenti Cozef Bayden 2024-cü ilin seçkisində dövlət başçısı vəzifəsinə namizəd olmaq fikrindədir. Novator.az CNN-ə istinadla bildirir ki, prezidentin niyyətini noyabrın 22-də Ağ evin mətbuat katibi rəsmən açıqlayıb.
Cozef Bayden 1942-ci il noyabrın 20-də doğulub. Delaver Universitetini tarixçi və politoloq ixtisasları ilə bitirib, həmçinin Sirakus Universitetinin Hüquq Məktəbində təhsil alıb.
Yeddi dəfə ABŞ Konqresinin yuxarı palatası olan Senatın üzvü seçilib, palatanın Məhkəmə Komitəsinə və Xarici Əlaqələr Komitəsinə sədrlik edib.
2009-2017-ci illərdə vitse-prezident postunu tutub.
2020-ci il noyabrın 3-də keçirilmiş ümumxalq səsverməsində Demokratlar Partiyasının namizədi olan Cozef Bayden 538 nəfərlik Seçicilər Kollegiyasına 306 nümayəndə qazanıb. Seçicilər Kollegiyasındakı 14 dekabr 2020-ci il səsverməsi də eyni nəticə ilə yekunlaşıb. Qələbə üçün 270 səs kifayətdir.
2021-ci il yanvarın 7-də ABŞ Konqresində – Senat və Nümayəndələr Palatasının birgə iclasında Seçicilər Kollegiyasındakı səsvermənin nəticəsi təsdiqlənib, yanvarın 20-də Cozef Bayden and içib prezident səlahiyyətlərinin icrasına başlayıb.
1789-cu ildən başlayaraq ABŞ-da 46 nəfər prezident postunu tutub. Tarixi ənənəyə, 1951-ci ildən bəri isə həm də konstitusiya normasına görə, ABŞ-da eyni şəxs maksimum iki dəfə prezident olur. Yalnız Franklin Ruzvelt dövlət başçısı postuna iki dəfədən artıq (1932, 1936, 1940, 1944-cü illərdə) seçilib.
ABŞ-da prezident seçkisi 4 ildən bir noyabr ayının ilk çərşənbə axşamı keçirilir.
Mənbə: Cnn.com
