Neçə işsizə ödəniş təyin edilib?
Əmək və Əhalinin Sosial Müdafiəsi Nazirliyinin hesabatına görə, Dövlət Məşğulluq Agentliyi 2021-ci ilin yanvar-oktyabr aylarında 3033 nəfərə işsizlikdən sığorta ödənişi təyin edib. Ümumilikdə 12164 nəfərə sığorta ödənişi həyata keçirildiyi bildirilir.
“İşsizlikdən sığorta haqqında” qanuna əsasən, sığorta ödənişini dövlət orqanı və ya hüquqi şəxs ləğvi edildikdə; işçilərin və ya dövlət qulluqçularının sayı və ya ştatları ixtisar edildikdə; əmək müqaviləsinin müddəti qurtardıqda rəsmən işsiz kimi qeydiyyata alınmış sığortaolunanlar ala bilər.
İlk iki halda ödəniş işçinin itirilmiş orta aylıq əməkhaqqının 50 faizi məbləğində hesablanır. Əmək münasibətlərinə əmək müqaviləsinin müddətinin bitməsi əsasları ilə xitam verilmiş şəxslərə sığorta ödənişi minimum əməkhaqqı (250 manat) qədər ödənir.
Novator.az bildirir ki, Dövlət Statistika Komitəsinin hesabatına görə, 2021-ci il noyabrın 1-nə iqtisadi fəal əhalinin sayı 5 milyon 299,8 min nəfər olub, onların 4 milyon 984,5 min nəfərini məşğul əhali təşkil edib. Bu, 315,3 min nəfər işsiz deməkdir.
