Çexiya hökumətinə kim başçılıq edəcək?
Çexiyada yeni hökumət qurulur. Novator.az-ın məlumatına görə, baş nazirliyə namizəd Petr Fiala noyabrın 17-də kabinet üzvlərinin siyahısını prezident Miloş Zemana təqdim edib.
Planlaşdırılan hökumətə beş siyasi qüvvə daxildir: Vətəndaş Demokrat Partiyası, Xristian Demokrat İttifaqı, Ənənə, Məsuliyyət və Çiçəklənmə Partiyası, Pirat Partiyası, Yaşlılar və Müstəqillər Partiyası.
Petr Fiala 1964-cü ildə doğulub. 2014-cü ildən Vətəndaş Demokrat Partiyasının sədridir. 2013 və 2017-ci illərdə parlamentin deputatı seçilib. Təhsil, gənclər, bədən tərbiyəsi naziri, parlament sədrinin müavini postlarını tutub.
Oktyabrın 8-9-da Çexiyada parlamentin aşağı palatasına seçki keçirilib. 2017-ci il dekabrın 6-dan baş nazir postunu tutan Andrey Babişin başçılıq etdiyi Narazı Vətəndaşlar Aksiyası 200 yerlik qanunverici orqana 72 mandatla düşüb.
Vətəndaş Demokrat Partiyası 34, Yaşlılar və Müstəqillər Partiyası 33, Xristian Demokrat İttifaqı 23, Azadlıq və Birbaşa Demokratiya Partiyası 20, Ənənə, Məsuliyyət və Çiçəklənmə Partiyası 14, Pirat Partiyası 4 mandat əldə edib.
