Bölgələr üzrə orta maaş
Dövlət Statistika Komitəsi muzdlu işçilərin orta aylıq nominal əməkhaqqını 2021-ci il oktyabrın 1-nə 723,2 manat göstərib. Novator.az bildirir ki, hesabata görə, Bakıda orta maaş 939,1 manat olub. Paytaxtdan sonrakı ilk üçlük belə sıralanır: Daşkəsən – 658,1 manat, Gədəbəy – 657,9 manat, Sumqayıt – 637,8 manat.
Naxçıvan Muxtar Respublikasında orta maaş 545,3 manat məbləğində rəsmiləşib. Bölgənin hər yerində orta əməkhaqqı 500 manatı üstələyib, ən yuxarı göstərici Sədərək rayonunda qeydə alınıb: 626,3 manat.
Şirvan şəhərində orta əməkhaqqı 586 manat, Abşeron rayonunda 567,9 manat, Siyəzəndə 561,2 manat, Qubadlıda 553,5 manat, Biləsuvarda 542,3 manat, Gəncədə 536,6 manat, Zəngilanda 526,7 manat, Salyanda 525,8 manat, Şəmkirdə 514,5 manat, Hacıqabulda 509,6 manat, İmişlidə 508,9 manat, Qubada 502,3 manat olub.
Rəsmi statistika Şuşa rayonu üzrə orta maaşı 532,3 manat, Xocalı rayonu üzrə 526,3 manat, Xocavənd rayonu üzrə 525,8 manat məbləğində bəyan edib.
Qalan bölgələrdə orta maaş 500 manatdan aşağıdır.
Ölkədə minimum maaş 250 manatdır.
Əmək və Əhalinin Sosial Müdafiəsi Nazirliyinin hesabatına görə, 2021-ci ilin əvvəlinə muzdla çalışanların yarısı 343 manatdan çox, yarısı həmin məbləğdən az əməkhaqqı alıb.
