Türkiyəli heyət
Avropada 22-ci dünya futbol çempionatının seçmə mərhələsinin qrup raundu bitib. Novator.az bildirir ki, qrupların 10 qalibi 2022-ci il noyabrın 21-dən dekabrın 18-dək Qətərdə keçiriləcək final mərhələsinə vəsiqə alıb: Serbiya, İspaniya, İsveçrə, Fransa, Belçika, Danimarka, Niderland, Xorvatiya, İngiltərə, Almaniya.
32 biletin daha 3-ü Avropaya ayrılıb. Bu vəsiqələr uğrunda üç kvartetə bölünən 12 komanda mübarizə aparacaq: Portuqaliya, İsveç, İtaliya, Ukrayna, Uels, Çexiya, Şotlandiya, Avstriya, Türkiyə, Rusiya, Polşa, Şimali Makedoniya. Raundun yarımfinal və final oyunları 2022-ci ilin mart ayına təyin olunub.
Final mərhələsinə Afrikanın 5, Asiyanın 4, Cənubi Amerikanın 4, Şimali və Mərkəzi Amerikanın 3 vəsiqəsi var. 2 vəsiqə Asiya, Cənubi Amerika, Okeaniya, Şimali və Mərkəzi Amerika təmsilçiləri arasında əlavə oyunlarda müəyyənləşir, 1 vəsiqə çempionat sahibinə verilir.
Cənubi Amerikadan Braziliya və Argentina final mərhələsinə vəsiqəni təmin edib.
1930-cu ildən keçirilən dünya çempionatlarında Braziliya 5 dəfə, İtaliya və Almaniya 4 dəfə, Uruqvay, Argentina və Fransa 2 dəfə, İngiltərə və İspaniya 1 dəfə qızıl medallara sahib olub.
