Nobel laureatı yenidən baş redaktor seçilib
Nobel mükafatı laureatı Dmitri Muratov yenidən “Novaya qazeta”nın baş redaktoru seçilib.
Novator.az-ın məlumatına görə, səsvermə noyabrın 15-də qəzetin redaksiyasında (Moskva şəhəri) keçirilib.
Səsverməyə 153 ştatlı işçidən 102 nəfəri qatılıb. Onlardan 70-i birbaşa redaksiyada, 32-si kənardan elektron üsulda səs verib.
Dmitri Muratov səslərin 92,16 faizini toplayıb. 102 nəfərdən 94-ü onun lehinə, 8-i əleyhinə səs verib.
Muratov baş redaktor postuna yeganə namizəd olub.
“Novaya qazeta”da baş redaktor seçkisi iki ildən bir keçirilir. Qəzetin nizamnaməsinə əsasən, işçilərin yarıdan çoxu iştirak etdikdə səsvermənin nəticəsi etibarlı sayılır.
1961-ci il təvəllüdlü Dmitri Muratov “Novaya qazeta”nın yaradıcılarından biridir. O, 1995-2017-ci illərdə baş redaktor postunu tutub, 2019-cu ildə yenidən baş redaktor postuna qayıdıb. 2019-cu il seçkisində Muratov səslərin 51,7 faizini toplayaraq baş redaktor seçilib.
1993-cü ildən çıxan “Novaya qazeta” jurnalist araşdırmaları ilə tanınır, həftənin bir, üç və beşinci günləri işıq üzü görür.
Dmitri Muratov Nobel sülh mükafatına 2021-ci ildə layiq görülüb. Norveç Nobel Komitəsi Muratovun və Mariya Ressanın (Filippin və Amerika jurnalistidir) Nobel mükafatına demokratiya və davamlı sülhün bünövrəsi olan ifadə azadlığı uğrunda fəaliyyətlərinə görə layiq bilindiklərini açıqlayıb.
