Büdcə bir raundu keçdi
Parlamentin 16 noyabr iclasında 2022-ci ilin büdcə layihəsi ilk oxunuşda qəbul edilib.
Novator.az bildirir ki, dövlət büdcəsi layihəsində 26,8 milyard manat gəlir, 29,8 milyard manat xərc rəsmiləşir. Dövlət Neft Fondundan büdcəyə 12 milyard 710 milyon manat köçürmə, Dövlət Vergi Xidmətindən 8 milyard 820 milyon manat, Dövlət Gömrük Komitəsindən 4 milyard 260 milyon manat daxilolma nəzərdə tutulur. Büdcədənkənar gəlirlər 760 milyon manat, digər daxilolmalar 260 milyon manat proqnozlaşdırılır.
İqtisadi fəaliyyətə 5,9 milyard manat, müdafiə və milli təhlükəsizliyə 4,4 milyard manat, ümumi dövlət xidmətlərinə 4,2 milyard manat, təhsilə 3,8 milyard manat, sosial müdafiə və sosial təminata 3,5 milyard manat ayrılması gözlənir.
Başqa xərc istiqamətləri belə sıralanır: məhkəmə hakimiyyəti, hüquq mühafizə və prokurorluq – 2,3 milyard manat; səhiyyə – 1,7 milyard manat; kənd təsərrüfatı – 997,3 milyon manat; mədəniyyət, incəsənət, informasiya, bədən tərbiyəsi, gənclər siyasəti və bu qəbildən olan digər fəaliyyət – 458,7 milyon manat; ətraf mühitin mühafizəsi – 285,8 milyon manat; mənzil və kommunal təsərrüfatı – 261,4 milyon manat; əsas bölmələrə aid edilməyən xərclər – 1 milyard 590,2 milyon manat.
Büdcə zərfinə daxil olan başqa sənədlərə gəlincə, Dövlət Sosial Müdafiə Fondunun büdcə layihəsində gəlirlər və xərclər 5 milyard 306,7 milyon manat göstərilir. İşsizlikdən sığorta fondunun büdcə layihəsində də gəlirlərlə xərclər eynidir: 180,3 milyon manat.
2022-ci il üçün yaşayış minimumu ölkə üzrə 210 manat, əmək qabiliyyətli əhali üçün 220 manat, pensiyaçılar ucun 176 manat, uşaqlar üçün 193 manat məbləğində müəyyən edilir. Ünvanlı dövlət sosial yardımının təyin edilməsi məqsədilə ehtiyac meyarının həddini 200 manat məbləğində təsdiqləmək planlaşdırılır.
