Bolqarıstanda ilkin mandat bölgüsü
Bolqarıstanda noyabrın 14-də keçirilmiş növbədənkənar parlament seçkisinin ilkin nəticələrinə görə, qanunverici orqana 7 siyasi qüvvə düşür. Novator.az bildirir ki, Yeniliklərə Davam Partiyası 67, GERB Partiyası 59, Hüquq və Azadlıq Hərəkatı 34, Sosialist Partiyası 26, Belə Xalq Var Partiyası 25, Demokratik Bolqarıstan Partiyası 16, Dirçəliş Partiyası 13 mandat götürür.
Proporsional üsulla seçilən Bolqarıstan parlamenti 240 deputatdan ibarətdir. Bu il aprelin 4-də və iyulun 11-də keçirilmiş parlament seçkilərindən sonra hökumət qurmaq mümkün olmayıb.
Noyabrın 14-də həmçinin prezident seçkisi keçirilib. Sosialist Partiyasının namizədi, indiki dövlət başçısı Rumen Radev və GERB Partiyasının namizədi, Sofiya Universitetinin rektoru Anastas Qerdcikov ikinci tura vəsiqə alıblar. İkinci tur noyabrın 21-nə təyin olunub.
1963-cü il təvəllüdlü Rumen Radev 2016-cı il noyabrın 13-də prezident seçilib, 2017-ci il yanvarın 22-də səlahiyyətlərinin icrasına başlayıb.
