Hərbi qulluqçuya mənzil qaydası necə yeniləndi?
Prezident İlham Əliyevin 28 dekabr 2011-ci il fərmanı Silahlı Qüvvələrin 20 təqvim ili və daha çox qüsursuz xidmət etmiş hərbi qulluqçularının dövlət vəsaiti hesabına mənzillə təmin edilməsini nəzərdə tutub. 2021-ci il noyabrın 15-də yeni fərman imzalayan dövlət başçısı mənzil alan hərbi qulluqçuların siyahısını hazırlamağa, tələb olunan mənzillərin sayını və bölgüsünü müəyyən etməyə məsul komissiyanın tərkibini yeniləyib. Maliyyə nazirinin sədrlik etdiyi komissiyanın üzvləri belə sıralanır: müdafiə nazirinin müavini, Dövlət Şəhərsalma və Arxitektura Komitəsi sədrinin müavini, İqtisadiyyat Nazirliyi yanında Əmlak Məsələləri Dövlət Xidməti rəisinin müavini, Prezident Administrasiyasının hərbi məsələlər şöbəsi müdirinin müavini.
Komissiyanın katibliyi funksiyaları Maliyyə Nazirliyinə tapşırılıb.
Novator.az bildirir ki, başqa yeniliyə görə, dövlət vəsaiti hesabına mənzillə təmin edilmə Azərbaycan Ordusunun hərbi qulluqçularına şamil olunur.
Fərmanda digər yenilik “qüsursuz xidmət” müddətinə aydınlıq gətirir. Bu müddətlər hərbi qulluqçunun qüsursuz hərbi xidmət müddətinə daxil edilmir: hərbi rütbəni aşağı salma intizam tənbehinin daha əvvəl hərbi qulluqçunun üzərindən götürülməsi halları istisna olmaqla həmin intizam tənbehi tətbiq edildiyi gündən bir il müddəti; hərbi xidmət əleyhinə olan inzibati xəta törədilməsinə görə çıxarılmış inzibati tənbeh vermə haqqında qərarın icrasını bitirdiyi gündən bir il müddəti; məhkumluğun olduğu müddət. Azərbaycan Ordusunun 20 təqvim ili və daha çox xidmət etmiş hərbi qulluqçusu həmin müddətlərdə dövlət vəsaiti hesabına mənzillə təmin edilə bilməz.
