Bolqarıstanda iki seçki
Bolqarıstanda noyabrın 14-də keçirilmiş prezident və parlament seçkilərinin ilkin nəticələri açıqlanıb. Novator.az bildirir ki, prezident seçkisində indiki dövlət başçısı, Sosialist Partiyasının namizədi Rumen Radev 49,1% səslə önə çıxıb. GERB Partiyasının namizədi, Sofiya Universitetinin rektoru Anastas Qerdcikov 26,5% nəticə göstərib. Noyabrın 21-nə təyin olunan ikinci turda bu iki namizəd yarışacaq.
Növbədənkənar parlament seçkisində Yeniliklərə Davam Partiyası liderlik edir. GERB Partiyası ikinci, Hüquq və Azadlıq Hərəkatı üçüncüdür.
Proporsional sistemin tətbiq olunduğu seçkidə parlamentə düşmək üçün tələb olunan 4% səs həddini Belə Xalq Var; Sosialist; Demokratik Bolqarıstan; Dirçəliş partiyalarının da keçdiyi bildirilir.
1963-cü il təvəllüdlü Rumen Radev 2016-cı il noyabrın 13-də prezident seçilib, 2017-ci il yanvarın 22-də səlahiyyətlərinin icrasına başlayıb.
Bolqarıstan parlamenti 240 deputatdan ibarətdir. Bu il aprelin 4-də və iyulun 11-də keçirilmiş parlament seçkilərindən sonra hökumət qurmaq mümkün olmayıb.
