Azərbaycan UEFA reytinqində
Azərbaycan UEFA-nın klub reytinqində 25-ci pilləyə yüksəlib. Novator.az bildirir ki, 55 UEFA üzvünün yer aldığı reytinqdə Rusiya 10-cu, Ukrayna 11-ci, Türkiyə 18-ci, Qazaxıstan 29-cu, Belarus 32-ci, Moldova 33-cü, Litva 34-cü, Latviya 37-ci, Ermənistan 43-cü, Gürcüstan 46-cı, Estoniya 49-cu pillədə qərar tutub.
2021-2022 mövsümünün klub turnirlərində qrup mərhələsinin dörd turu geridə qalıb. Çempionlar Liqası, Avropa Liqası və Konfrans Liqasının hər birində 32 klub yarışır. Azərbaycan Konfrans Liqasında “Qarabağ” komandası ilə təmsil olunur, bu klubun qrup mərhələsini dəf etdiyi dəqiqləşib.
UEFA-nın klub reytinqi turnirlərdə son beş mövsümdə qazanılan əmsala əsaslanır. Təsnifat mərhələlərində qələbə 1 xal, heç-heçə yarım xal, qrup mərhələsində, 1/8 final, 1/4 final, yarımfinal və finalda qələbə 2 xal, heç-heçə 1 xaldır.
Çempionlar Liqasının qrup mərhələsi 4 bonus xalı, 1/8 finalı 5 bonus xalı, 1/4 finalı, yarımfinalı və finalı 1 bonus xalı verir.
Avropa Liqasında qrup qalibi olmağa 4 bonus xalı, qrupda ikinci yeri tutmağa 2 bonus xalı, 1/8 finala, 1/4 finala, yarımfinala və finala adlamağa 1 bonus xalı düşür.
Konfrans Liqasında qrup qalibi olmaq 2 bonus xalı, qrupda ikinci yeri tutmaq 1 bonus xalı, yarımfinal və final 1 bonus xalı qazandırır.
Toplanan xallar qitə turnirlərinə vəsiqə almış ölkə klublarının sayına bölünür və mində bir dəqiqliklə əmsal çıxarılır.
Bu mövsüm Azərbaycan 4,125 əmsal əldə edib.
