Həbs qərarı qüvvədə qalıb
Bakı Apellyasiya Məhkəməsi noyabrın 3-də AXCP fəalı Mütəllim Orucovun həbsindən şikayətə baxıb. “Turan”ın məlumatına görə, şikayət təmin olunmayıb.
Mütəllim Orucov bir neçə il Almaniyada yaşayıb, Azərbaycandakı siyasi məhbusların müdafiəsinə həsr olunmuş etiraz aksiyalarında fəal iştirak edib. 2021-ci il iyunun 1-də o, Almaniyadan Azərbaycana qaytarılıb.
Oktyabrın 22-si Mütəllim Orucov Quba rayonunda polisə çağırılandan sonra yoxa çıxıb. Oktyabrın 27-də vəkil Nemət Kərimli Mütəllim Orucovun həbs edildiyini öyrənib. Nərimanov Rayon Məhkəməsinin qərarı əsasında 4 ay müddətinə həbsə alınan fəala satış məqsədi ilə qanunsuz olaraq külli miqdarda narkotik vasitə saxlama ittihamı verilib. Bu ittiham 5 ildən 12 ilədək müddətə azadlıqdan məhrumetmə cəzası nəzərdə tutur.
Noyabrın 3-ü Bakı Apellyasiya Məhkəməsində çıxış edən Mütəllim Orucov polisdə işgəncələrə məruz qaldığını deyib.
İstintaqın iddiasına görə, cəbhəçidə 8 qram heroin aşkar edilib. Lakin fəal özünü günahkar saymır və həbsini Almaniyadakı siyasi fəaliyyəti ilə əlaqələndirir.
