Evdə baha, çöldə ucuz
Azərbaycan Demokratiya və Rifah Partiyasının sədri, iqtisadçı alim Qubad İbadoğlu təbii qazın əhaliyə və xarici ölkələrə satış qiymətlərini müqayisə edib. Novator.az-ın məlumatına görə, o yazır ki, 2021-ci ilin yanvar-sentyabr aylarında Azərbaycanın ixrac etdiyi təbii qazın min kubmetri Yunanıstana 326, İtaliyaya 317,2, Türkiyəyə 154, Bolqarıstana 153, Gürcüstana 92,3 ABŞ dollarına satılıb: “Ölkə əhalisinə satılan qazın min kubmetrinin maksimum qiyməti 147,7 dollar olub. Səmt qazı BP-dən havayı alınır, ancaq Azərbaycanın öz əhalisinə satdığı qaz Gürcüstana satdığı qazdan bahadır, Türkiyə və Bolqarıstana satdığı qazın qiyməti ilə demək olar eynidir. Necə ola bilər ki, yüz kilometrlər boyu daşınan qaz Gürcüstanda Bakıda satılan qazdan 55,4 dollar ucuz, min kilometrlər boyu daşınan qaz Türkiyə və Bolqarıstanda Bakıda satılan qazdan bir az baha olsun?”
Dövlət Statistika Komitəsinin hesabatına görə, 2021-ci ilin yanvar-sentyabr aylarında Azərbaycanda 23,4 milyard kubmetr təbii qaz hasil olunub.
Dövlət Gömrük Komitəsi bildirir ki, yanvar-sentyabr aylarında Azərbaycan 2,9 milyard dollarlıq qaz ixrac edib. Ölkədən qaz alan ölkələr statistik dəyərə görə belə sıralanır:
İtaliya – 1 milyard 267,9 milyon dollar
Türkiyə – 1 milyard 206,7 milyon dollar
Gürcüstan – 280,9 milyon dollar
Yunanıstan – 163,7 milyon dollar
Bolqarıstan – 25,5 milyon dollar
İran – 6,4 milyon dollar.
Noyabrın 1-dən Azərbaycanda təbii qazın əhaliyə satış qiyməti belədir:
1200 kubmetrədək (1200 kubmetr daxil) istehlak – kubmetri 12 qəpik;
1200-2500 kubmetr istehlak – kubmetri 20 qəpik;
2500 kubmetrdən çox istehlak – kubmetri 25 qəpik.
