Amnistiya çağırışları
Şuşa şəhərinin işğaldan azad edildiyi 8 noyabr – Zəfər Günü münasibətilə amnistiya aktı qəbul olunacağı ehtimalı var. Novator.az-ın məlumatına görə, AXCP sədri Əli Kərimli hakimiyyəti amnistiya zamanı siyasi məhbuslara qarşı ayrı-seçkilik etməməyə çağırır: “Cəbhəçi siyasi məhbuslar, vətəndaş cəmiyyəti təmsilçiləri, inanclı siyasi məhbuslar – bütün siyasi məhbuslar bu amnistiya ilə azad edilməlidir. Hakimiyyətin erməni diversantları da azad etdiyi bir zamanda siyasi məhbuslara növbəti dəfə kinlə, qərəzlə yanaşılsa, bu, Şuşanın azad edildiyi Zəfər Gününün ovqatına yaraşmaz və ictimai vicdanı yenidən sızladar. Hakimiyyət bu səhvdən qaçmağı, kin və qisas hissini cilovlamağı bacarmalıdır. Xalqımızın sosial sifarişi bütün təbəqələri təmin edəcək “qızıl amnistiya”dır!”
AXCP funksioneri Fuad Qəhrəmanlı da geniş amnistiya tərəfdarıdır. O yazır ki, dövlət hər bir məhkumun saxlanmasına gündə təqribən 21 manat ayırır: “Həbsxanada ailəsinin, yaxınlarının gətirdiyi ərzaqla keçinən məhkumlara bu vəsaitin 1 manatının da çatmaması ayrı söhbətin mövzusudur. Nəzərə çatdırmaq istədiyimiz 22 mindən artıq dustağın saxlanmasının dövlət büdcəsinə ağır yük olmasıdır. Bu, günə təqribən 500 min, aya 14 milyon, ilə 170 milyon manat eləyir. Dövlət büdcəsini bu qədər yükləməyə dəyərmi? Ehtiyac içində olanların sosial müavinətlərini kəsincə məhkumların sayını azaldıb ən azı 100 milyon manata qənaət etmək olar.
Xüsusilə ağır cinayət törətmiş şəxslər istisna olmaqla gün məhkumların çoxunu həbsxanalarda saxlamağın yeri yoxdur. Onların azadlığa çıxması cəmiyyət üçün də, ailələri üçün də, dövlət üçün də faydalı olardı. Bütün məhkumlara şamil olunacaq kütləvi amnistiya hakimiyyətin imicinə də müsbət təsir edər”.
