Rusiya: siyasi məhbuslar nə qədər artıb?
Son beş ildə Rusiyada siyasi məhbusların sayı beş dəfə artıb. Novator.az bildirir ki, Böyük Britaniyanın “The Times” qəzeti Rusiyanın “Memorial” hüquq müdafiə qurumuna istinadla belə yazır.
Xəbərə görə, hazırda Rusiyada 420 nəfərə yaxın siyasi məhbus var. Hüquq müdafiəçiləri deyirlər ki, 2016-cı ildə bu göstərici 100 nəfəri aşmırdı.
“Memorial” siyasi məhbusların sayının artmasını dini motivli həbslərdə yüksəlişlə əlaqələndirir. Siyasi məhbusların 360-nın dini motivlərlə tutulduğu iddia olunur. Açıqlamaya görə, onların çoxu Rusiyada fəaliyyətinə qadağa qoyulmuş müsəlman təşkilatlarının təmsilçiləri və ekstremist təşkilatlar siyahısına salınan “Yehova şahidləri” icmasının üzvləridir.
Ancaq hüquq müdafiəçiləri həmçinin bəyan edirlər ki, Rusiyada 2020-ci ilin noyabrından repressiya dalğası başlayıb və həmin vaxtdan ötən müddət ərzində müxalif lider Aleksey Navalnı, onun tərəfdarları həbs olunub.
“The Times” yazır ki, “Memorial” rəsmisi Sergey Davidis mediaya açıqlamasında 420 rəqəminin siyasi məhbusların tam sayını əks etdirmədiyini vurğulayıb: “Real rəqəmlərin yüksək olduğunu nəzərə almaq lazımdır”.
Sergey Davidis Rusiyada siyasi məhbus sayının 1991-ci ildə dağılmış SSRİ-nin son illərindəki məhbus sayı ilə müqayisə olunası həddə çatdığını qeyd edib: “Sovet İttifaqı Kommunist Partiyasının baş katibi Mixail Qorbaçov siyasi məhbusları azad etməyənə qədər onların sayı 700 nəfərə qədər idi”.
Mənbə: Thetimes.co.uk
