Bölgələr özünü dolandırır?
2022-ci ilin dövlət büdcəsi layihəsində yerli gəlir və xərcləri tənzimləmək üçün mərkəzləşdirilmiş xərclərdən 37 milyon 456 min manat ayırmaq proqnozlaşdırılır. 51 şəhər və rayon (Bakı, Gəncə, Lənkəran, Mingəçevir, Naftalan, Sumqayıt, Şəki, Şirvan, Yevlax, Abşeron, Ağcabədi, Ağdaş, Ağstafa, Ağsu, Astara, Beyləqan, Bərdə, Biləsuvar, Cəlilabad, Daşkəsən, Füzuli, Gədəbəy, Göyçay, Göygöl, Hacıqabul, Xaçmaz, Xızı, İmişli, İsmayıllı, Kürdəmir, Qazax, Qəbələ, Qobustan, Quba, Qubadlı, Qusar, Masallı, Neftçala, Saatlı, Sabirabad, Salyan, Samux, Siyəzən, Şabran, Şamaxı, Şəmkir, Şuşa, Tərtər, Tovuz, Ucar, Zaqatala) dotasiya almayacaq.
Novator.az-ın məlumatına görə, iqtisadçı Natiq Cəfərli yazır ki, Azərbaycan hökumətinin ən çox sevdiyi bir məsələ də rəqəmlərlə oynamaqdır: “Prezident çıxışlarında, “rayonlar özünü dolandırmalıdır” deyir, hökumət də rəqəmlərlə rəqs etməyə girişib, kağız üzərində bəzi hesablama qaydalarını dəyişiblər. Amma dəyişən bir şey yoxdur.
Rayonların özünü dolandırması üçün bələdiyyə institutu güclənməli, icra hakimiyyəti ləğv edilməli, bələdiyyələrin müstəqil büdcəsinin formalaşdırılması qaydaları müəyyən edilməli, bələdiyyə ərazisindən toplanan vergilərin bir hissəsi onlarda qalmalıdır. Belə bir sistem qurulmadan, “filan rayon özünü dolandırır” iddiası baş aldatmaqdır, söz və rəqəm oyunudur”.
İqtisadçı Rövşən Ağayev qeyd edir ki, rayonlarda orta təhsilə, səhiyyənin saxlanmasına, aqrar sektorun inkişafına, mədəniyyət-idman tədbirlərinə, yol-nəqliyyat infrastrukturunun saxlanmasına, sosial müdafiənin maliyyələşdirilməsinə dövlət büdcəsindən vəsait ayrılır: “Maliyyə müstəqilliyi yalnız icra başçılarının öz aparatını və mənzil istismar sahələrini saxlaması ilə müəyyən edilmir. Bizim hökumət özünümaliyyələşdirməni yalnız bu xərclərin çərçivəsi ilə məhdudlaşdırır”.
