Büdcə redaktəsinin məntiqi
Maliyyə Nazirliyi sentyabrda açıqlanmış ilkin variantda 2022-ci ilin dövlət büdcəsinin gəlirlərini 26 milyard 407 milyon manat, xərclərini 28 milyard 974 milyon manat göstərmişdi. Bu ay parlamentə təqdim olunan rəsmi layihədə 26 milyard 816 milyon manat büdcə gəliri, 29 milyard 879 milyon manat xərc nəzərdə tutulur.
Novator.az-ın məlumatına görə, yeniliyi şərh edən iqtisadçı Rövşən Ağayev yazır: “Əvvəlki proqnozla müqayisədə büdcənin gəlirlər hissəsi 409 milyon manat, xərcləri 905 milyon manat artırılır. Çox güman, hökumət xərclərin artımını enerji daşıyıcılarının bahalaşdırılması fonunda sosial paketlə əlaqələndirəcək.
Dəyişən göstəricilərdən biri də Dövlət Neft Fondundan büdcəyə köçürmənin həcmidir. İlkin sənəddə fonddan 11 milyard 860 milyon manat transfert nəzərdə tutulmuşdu. Son proqnoza görə, həmin məbləğ 850 milyon manat artırılaraq 12 milyard 710 milyon manata çatdırılır.
İlkin versiyada başqa büdcə yığımları 14 milyard 547 milyon manat idi, indi məbləğ 441 milyon manat azalaraq 14 milyard 106 milyon manata endirilir. Görünür, hökumət bilib ki, proqnozlar real deyil və iqtisadiyyatın həmin vergi yığımlarını təmin etməsi mümkün olmayacaq.
Tənzimlənən tariflərin qəfil artımı, bu üzdən xərclərə yenidən baxılması da göstərir ki, hökumətin iqtisadiyyatı nəinki orta və uzun, hətta qısa dönəmdə planlaşdırması ciddi problem olaraq qalır”.
2022-ci il büdcəsinin layihəsi
