200 manata yaşamaq
Hökumət 2022-ci ildə yaşayış minimumunun məbləğini 205 manat müəyyən etməyi nəzərdə tutur. Hazırda yaşayış minimumu 196 manatdır.
Novator.az-ın məlumatına görə, ADR Partiyasının sədri, iqtisadçı Qubad İbadoğlu yazır ki, 2022-ci ildə ünvanlı dövlət sosial yardımının təyinatı üçün ehtiyac meyarının həddini 170 manatdan 200 manata qaldırmaq planı da var: “Ehtiyac meyarının məbləğinin qaldırılması ünvanlı sosial yardım alanlara ödənişlərin artımına gətirib çıxaracaq. Əslində ehtiyac meyarının həddi ilə ölkə üzrə yaşayış minimumunun məbləği arasında fərq olmamalıdır. Odur ki, hökumət ehtiyac meyarı göstəricisini 5 manat artırmaqla məbləğləri eyniləşdirə və yaşayış minimumu göstəricisindən istifadə edə bilər. Bu, sosial siyasətin tənzimlənməsində daha düzgün yanaşma olardı.
Başqa bir məsələ 200 manata bir ay yaşamağın mümkünlüyü məsələsidir. Azərbaycanının bütün yerlərində yaşamağın xərcləri eynidirmi? Ehtiyac meyarı həddinin il ərzində dəyişməz qalması nə qədər əsaslıdır, qiymətlər artırsa, nədən bu məbləğ dəyişməz qalır?”
Yaşayış minimumu rəsmi minimum istehlak səbətinə əsaslanır. Səbətə ərzaq məhsulları, qeyri-ərzaq malları, xidmətlər daxildir.
“Ünvanlı dövlət sosial yardımı haqqında” qanuna görə, sosial yardım orta aylıq gəliri onlardan asılı olmayan səbəblərdən hər bir ailə üzvü üçün ehtiyac meyarının məcmusundan aşağı olan aztəminatlı ailələrə verilir.
