UEFA reytinqində durum
UEFA-nın klub turnirlərində qrup mərhələsinin üç turu geridə qalıb.
Novator.az bildirir ki, 55 üzvü olan UEFA-nın klub reytinqinə İngiltərə başçılıq edir. Onu İspaniya və İtaliya izləyir.
Rusiya reytinqin 10-cu, Ukrayna 11-ci, Türkiyə 19-cu, Azərbaycan 26-cı, Qazaxıstan 29-cu, Belarus 32-ci, Moldova 33-cü, Litva 34-cü, Latviya 37-ci, Ermənistan 43-cü, Gürcüstan 46-cı, Estoniya 49-cu pilləsində yer alır.
Çempionlar Liqası, Avropa Liqası və Konfrans Liqasının hər birində 32 klub yarışır. Azərbaycan Konfrans Liqasında “Qarabağ” komandası ilə təmsil olunur.
UEFA-nın klub reytinqi turnirlərdə son beş mövsümdə qazanılan əmsala əsaslanır. Təsnifat mərhələlərində qələbə 1 xal, heç-heçə yarım xal, qrup mərhələsində, 1/8 final, 1/4 final, yarımfinal və finalda qələbə 2 xal, heç-heçə 1 xaldır.
Çempionlar Liqasının qrup mərhələsi 4 bonus xalı, 1/8 finalı 5 bonus xalı, 1/4 finalı, yarımfinalı və finalı 1 bonus xalı verir.
Avropa Liqasında qrup qalibi olmağa 4 bonus xalı, qrupda ikinci yeri tutmağa 2 bonus xalı, 1/8 finala, 1/4 finala, yarımfinala və finala adlamağa 1 bonus xalı düşür.
Konfrans Liqasında qrup qalibi olmaq 2 bonus xalı, qrupda ikinci yeri tutmaq 1 bonus xalı, yarımfinal və final 1 bonus xalı qazandırır.
Toplanan xallar qitə turnirlərinə vəsiqə almış ölkə klublarının sayına bölünür və mində bir dəqiqliklə əmsal çıxarılır.
Bu mövsüm Azərbaycan 3,375 əmsal əldə edib.
