Koronavirusdan ölən səhiyyə işçilərinin sayı
2020-ci ilin yanvar ayından 2021-ci ilin may ayınadək dünyada 80-180 min nəfər arası səhiyyə işçisinin koronavirus infeksiyasından öldüyü ehtimal olunur.
Novator.az-ın məlumatına görə, bunu Dünya Səhiyyə Təşkilatının baş direktoru Tedros Qebreyesus bəyan edib.
Ümumilikdə dünyada 135 milyon səhiyyə işçisi var.
Tedros Qebreyesus deyib ki, əslində koronavirusa qarşı ilk növbədə səhiyyə işçiləri peyvəndlənməlidir: “Amma 119 ölkədən əldə olunan məlumatlar göstərir ki, dünyada orta hesabla hər beş səhiyyə işçisindən yalnız ikisi tam (hər iki dozada) peyvəndlənib”.
Vaksinlərin paylanması məsələsində qlobal ədalətsizliyin hökm sürdüyünü vurğulayan baş direktor əlavə edib ki, hətta hər beş səhiyyə işçisindən ikisinin peyvəndlənməsinə dair statistika da qlobal vəziyyəti dorğu-düzgün əks etdirmir, çünki bu, bütün dünya üzrə ümumiləşdirilmiş orta rəqəmdir, konkret bölgələrə nəzər salanda daha acınacaqlı statistikalar ortaya çıxır. Məsələn, Afrikada peyvəndlənmiş səhiyyə işçilərinin sayı hər 10 nəfərə nisbətdə bir adama da çatmır. Yüksək gəlirli ölkələrin çoxunda isə səhiyyə sahəsində çalışanların 80 faizi peyvənd olunub.
Dünya Səhiyyə Təşlilatının baş direktoru deyib: “Biz bütün ölkələrdə digər risk qrupları ilə birlikdə səhiyyə işçilərinin hamısının COVİD-19 infeksiyası əleyhinə peyvənd olunmasına çağırırıq”.
Tedros Qebreyesus milyonlarla tibb işçisinin hələ də peyvəndlənməməsinin günahını vaksin tədarükünə nəzarəti həyata keçirən dövlətlərdə və şirkətlərdə görür.
Mənbə: Aljazeera.com
