ADR-in sənədləri hazırlanır
Azərbaycan Demokratiya və Rifah (ADR) Partiyası dövlət qeydiyyatına alınmaq istiqamətində iş aparır. Novator.az-ın məlumatına görə, partiya sədri Qubad İbadoğlu oktyabrın 22-də bəyan edib ki, qeydiyyat üçün zəruri sənədlər hazırlanır, bu iş bitəndə Ədliyyə Nazirliyinə müraciət olunacaq: “Yaxın zamanlarda Ali Məclisin toplantısını keçirməyi planlaşdırırıq. Toplantıda Ali Məclisin sərbəst üzvləri, İdarə Heyəti seçiləcək, bundan sonra sədrin təyinatları olacaq. Yerli və mərkəzi rəhbər strukturları formalaşandan sonra ADR tam fəaliyyətə başlayacaq”.
ADR Partiyasının təsis qurultayı oktyabrın 17-də internet vasitəsilə keçirilib. 2015-ci ildən Qubad İbadoğlunun sədrliyi ilə fəaliyyət göstərmiş Azərbaycan Demokratiya və Rifah Hərəkatının bazasında yaradılan partiyanın nizamnamə və proqramı qəbul edilib, Mərkəzi Nəzarət-Təftiş Komissiyası, Ali Məclis formalaşıb, Qubad İbadoğlu sədr seçilib.
Siyasi partiyanın qeydiyyatı üçün azı 1000 vətəndaş onun üzvü olmalıdır. Hazırda ölkədə 58 partiyanın dövlət qeydiyyatı var.
