Müdafiə naziri Kəlbəcər və Laçına baş çəkib
Mod.gov.az-ın 21 oktyabr məlumatına görə, müdafiə naziri Zakir Həsənov Kəlbəcər və Laçında dislokasiya olunan hərbi hissələrin qışa hazırlığını yoxlayıb.
Nazirə bildirilib ki, yataqxana və xidməti otaqlar fasiləsiz istilik sistemi ilə təmin edilib, silah və texnikanın payız-qış mövsümünə keçidi təşkil olunub.
Hərbi qulluqçuların ərzaq və isti geyimlə təminatının normaya uyğun şəkildə icra edildiyi, yüksək dağlıq və sərt iqlim şəraiti olan ərazilərdəki bölmələrə normadan əlavə təminat və təchizat vasitələri ayrıldığı vurğulanıb.
Qeyd olunub ki, silah və texnikanın qış dövründə fasiləsiz və dayanıqlı istismarını təmin etmək məqsədilə bütün hərbi hissələr yüksək keyfiyyətli yanacaq-sürtgü materialları, digər zəruri ehtiyat hissələri və avadanlıqlarla təmin edilib.
Məruzə edilib ki, hər növ mebel və inventarla təmin olunmuş yeni modul tipli konteynerlərdən ibarət yaşayış məntəqələrinin quraşdırılması davam etdirilir.
Çətin relyefli ərazilərdə hərəkət yollarının inşa edilməsi və bərpa olunması istiqamətində görülən işlərlə də bağlı məlumat verilib.
Ermənistan 1988-1994-cü illərin təcavüzündə Azərbaycanın bütün cənub-qərbini ələ keçirib.
2020-ci il sentyabrın 27-dən Azərbaycanın apardığı hərbi əməliyyatlarda və noyabrın 10-da əldə olunan atəşkəs razılaşması nəticəsində Cəbrayıl, Füzuli, Zəngilan, Qubadlı, Ağdam, Kəlbəcər rayonları tam, Şuşa, Xocavənd, Xocalı, Laçın rayonları və keçmiş Ağdərə rayonu qismən azad edilib.
Xankəndi, Xocalı, Ağdərə, Xocavənd şəhərləri, Şuşa, Xocalı, Xocavənd rayonlarının və keçmiş Ağdərə rayonunun bir hissəsi işğalda, Laçın şəhəri və rayonun 6 kəndi bölgədə atəşkəsə məsul Rusiya Ordusu bölmələrinin nəzarətində qalır.
