Büdcənin doqquz ayı
Maliyyə Nazirliyi 2021-ci ilin dövlət büdcəsinin icrası üzrə hesabat yayıb. Novator.az bildirir ki, rəsmi məlumata görə, yanvar-sentyabr aylarında büdcə 17 milyard 871,6 milyon manat gəlir əldə edib: “Dövlət Vergi Xidmətinin xətti ilə büdcəyə 6 milyard 354,4 milyon manat, Dövlət Gömrük Komitəsinin xətti ilə 3 milyard 193,2 milyon manat daxil olub, Dövlət Neft Fondundan 7 milyard 309,7 milyon manat köçürülüb”.
Əmlak Məsələləri Dövlət Xidmətindən daxilolma 11,5 milyon manat, büdcədən maliyyələşən təşkilatların ödənişli xidmətlərindən daxilolma 454,1 milyon manat, sair daxilolmalar 308,7 milyon manat göstərilir, dövlət borcu və zəmanəti üzrə öhdəliklərin təminat fondundan 240 milyon manat vəsait gəldiyi vurğulanır.
Maliyyələşmə əməliyyatları üzrə 1 milyard 76,3 milyon manat vəsait cəlb edildiyi qeyd olunur.
Hesabata əsasən, büdcənin doqquz aylıq xərcləri 17 milyard 711,9 milyon manat həddində rəsmiləşib, vəsaitin 64,8 faizi cari xərclərə, 26,7 faizi əsaslı xərclərə, 8,5 faizi dövlət borcuna və öhdəliklərinə xidmətlə bağlı xərclərə yönəldilib.
