Mükafat Navalnıya verildi
Rusiyada həbsdə olan müxalif lider Aleksey Navalnı Avropa Parlamentinin Andrey Saxarov adına “Azad düşüncə mükafatı”na layiq görülüb.
Novator.az saytı ABŞ-ın “Reuters” agentliyinə istinadla xəbər verir ki, Avropa Parlamenti bununla bağlı qərarını oktyabrın 20-də açıqlayıb.
Navalnıdan başqa mükafata daha iki ən şanslı namizəd var idi: hüquq müdafiəçilərindən, jurnalistlərdən və mədəniyyət xadimlərindən ibarət bir qrup əfqan qadın və 2019-2020-ci illərdə Boliviyada prezident səlahiyyətlərini icra etmiş, 2021-ci ilin martından ölkəsində həbsdə olan siyasətçi Janin Anyes.
Aleksey Navalnı 2021-ci il yanvarın 17-dən həbsdədir. Hazırda o, 2 il 6 ay iki həftəlik azadlıqdan məhrumetmə cəzasını Moskva ətrafında yerləşən 2 saylı ümumi rejimli cəzaçəkmə müəssisəsində çəkir.
“Azad düşüncə mükafatı”nın Navalnıya təqdim olunması üçün dekabrın 15-də Avropa Parlamentində tədbir keçiriləcək.
Həmin günədək Navalnı həbsdən çıxmasa, mükafatın onun təmsilçisinə təqdim edilməsi gözlənir.
“Azad düşüncə mükafatı” 1988-ci ildən bəri insan hüquqları və fikir azadlığı uğrunda mübarizəyə görə verilir.
SSRİ dövrünün məşhur dissidenti akademik Andrey Saxarovun adını daşıyan mükafatın fondu 50 min avrodur.
Mənbə: Reuters.com
