Medianın İnkişafı Agentliyi: idarəçilikdə nə dəyişir?
Oktyabrın 19-da prezident İlham Əliyev Medianın İnkişafı Agentliyinin idarəçiliyində yeniliklərə fərman verib.
Novator.az bildirir ki, qurumun nizamnaməsində dəyişikliyə görə, agentliyə ümumi rəhbərliyi və nəzarəti həyata keçirən Müşahidə Şurası sədr və 4 üzvdən ibarətdir, cari rəhbərliyə məsul icraçı direktorun isə bir müavini var.
Başqa bir yeniliyə əsasən, şura agentliyin strukturunu, əməyin ödənişi fondunu, işçilərinin say həddini və onların əmək haqlarının (vəzifə maaşının, vəzifə maaşına əlavələrin, mükafatların və digər ödənişlərin) məbləğini prezidentlə razılaşdırıb təsdiqləməlidir.
Medianın İnkişafı Agentliyi bu il yanvarın 12-də Kütləvi İnformasiya Vasitələrinin İnkişafına Dövlət Dəstəyi Fondunun əsasında publik hüquqi şəxs kimi yaradılıb. Nizamnaməyə əsasən, Medianın İnkişafı Agentliyi medianın inkişafının dəstəklənməsi, media sahəsində mütəxəssislər hazırlanması və onların əlavə təhsilinin təşkili, audiovizual, çap, onlayn media subyektlərinin və informasiya agentliklərinin, habelə jurnalistlərin və digər media işçilərinin fəaliyyətinin, eləcə də media sahəsində yeni informasiya-kommunikasiya texnologiyalarının və innovasiyaların tətbiqinin stimullaşdırılması istiqamətində fəaliyyət göstərir.
Qurumun fəaliyyət istiqamətləri sırasında onlayn mediada yayımlanan informasiya qanunla nəzərdə tutulan tələblərə cavab vermədikdə bununla bağlı tədbir görülməsi məqsədilə aidiyyəti üzrə müraciət etmək; çap mediası və onlayn media sahəsində inzibati xəta əlamətləri aşkar etdikdə İnzibati Xətalar Məcəlləsinə uyğun olaraq tədbirlər görmək, cinayət əlamətləri olduqda isə aidiyyəti üzrə məlumat vermək kimi məsələlər də var.
Agentliyə yarandığı gündən Əhməd İsmayılov rəhbərlik edir. Əhməd İsmayılov 2020-ci il aprelin 4-dən Kütləvi İnformasiya Vasitələrinin İnkişafına Dövlət Dəstəyi Fondunun icraçı direktoru olub.
