Xarici ticarətin doqquz ayı
2021-ci ilin doqquz aylıq xarici ticarət statistikası açıqlanıb. Novator.az bildirir ki, hesabata görə, Dövlət Gömrük Komitəsi yanvar-sentyabr aylarında 14 milyard 629,8 milyon dollarlıq ixrac, 8 milyard 344,4 milyon dollarlıq idxal qeydə alıb, 182 ölkə ilə ticarət əməliyyatı aparılıb, gömrük orqanları büdcəyə 3 milyard 193,2 milyon manat vəsait ödəyib.
Rəsmi məlumata əsasən, ixracın 8,5 faizindən çoxu MDB ölkələrinin, 54,7 faizindən çoxu Avropa İttifaqı ölkələrinin, 36,7 faizindən çoxu başqa ölkələrin payına düşüb.
İdxalda MDB-nin payı 23,8 faiz, Avropa İttifaqının payı 19,4 faiz, başqa ölkələrin payı 56,8 faiz göstərilir.
Yanvar-sentyabr aylarında əsas tərəfdaş İtaliya olub, bu ölkə ilə ticarət ümumi dövriyyənin 26 faizi həcmində rəsmiləşib.
İxracda əsas ölkə İtaliya (ümumi ixracın 38,6 faizi), idxalda Rusiyadır (17,2 faiz).
Statistikaya əsasən, ixracın 87,6 faizi neft-qaz sektoruna daxil olan mallardır, idxalda ən böyük pay maşın, mexanizm, elektrik avadanlıqları və onların hissələrinə düşür: 24,4 faiz.
