ADR Partiyası yaradıldı
Azərbaycan Demokratiya və Rifah (ADR) Partiyası yaradılıb. Təsis qurultayı oktyabrın 17-də internet vasitəsilə keçirilib.
Meydan.tv-nin məlumatına görə, 2015-ci ildən Qubad İbadoğlunun sədrliyi ilə fəaliyyət göstərən Azərbaycan Demokratiya və Rifah Hərəkatının bazasında yaradılan partiyanın qurultayına 82 nəfər qatılıb. Nizamnamə və proqramın qəbul edildiyi, 7 nəfərlik Mərkəzi Nəzarət-Təftiş Komissiyasının, 64 nəfərlik Ali Məclisin formalaşdığı, Qubad İbadoğlunun partiya sədri seçildiyi bildirilir.
Siyasi partiyanın qeydiyyatı üçün azı 1000 vətəndaş onun üzvü olmalıdır. Hazırda ölkədə 56 siyasi partiyanın dövlət qeydiyyatı var.
Qubad İbadoğlu 1971-ci il sentyabrın 12-də Füzuli rayonunun Aşağı Güzlək kəndində doğulub. Azərbaycan Dövlət İqtisad Universitetini və həmin təhsil ocağının aspiranturasını bitirib. İqtisad elmləri namizədidir.
Azərbaycan Dövlət İqtisad Universitetində və dünyanın bir çox ölkəsinin ali məktəbində dərs deyib, “Ekonomiks” qəzetinə, “Ekspert” jurnalına baş redaktorluq, İqtisadi Tədqiqatlar Mərkəzinə rəhbərlik edib, 2014-2015-ci illərdə BMT-nin İnkişaf Proqramının xətti ilə Qırğızıstan hökumətində müşavir vəzifəsində çalışıb.
Uzun illər Müsavat Partiyasının rəhbərliyində təmsil olunub.
