Dövlət Statistika Komitəsi ticarət hesabatları açıqlayıb.

Novator.az bildirir ki, rəsmi məlumata görə, 2021-ci ilin yanvar-sentyabr aylarında pərakəndə ticarət şəbəkəsində istehlakçılara 16 milyard 406,3 milyon manatlıq ərzaq məhsulları, içkilər və tütün məmulatları, 13 milyard 943,8 milyon manatlıq qeyri-ərzaq malları satılıb, 2020-ci ilin eyni dövrü ilə müqayisədə dövriyyə real ifadədə 2,8 faiz, o cümlədən ərzaq məhsulları, içkilər və tütün məmulatları üzrə 2,4 faiz, qeyri-ərzaq malları üzrə 3,3 faiz artıb.

Doqquz ayda istehlaka xərclənən vəsaitin 49 faizinin ərzaq məhsullarının, 5,1 faizinin içkilər və tütün məmulatlarının payına düşdüyü vurğulanır.

Başqa bir hesabata görə, yanvar-avqust aylarında Azərbaycanın hüquqi və fiziki şəxsləri 180 ölkədəki tərəfdaşları ilə ticarət əməliyyatları həyata keçirib, 111 ölkəyə məhsul ixrac olunub, 167 ölkədən idxal rəsmiləşib.

Səkkiz ayda xarici ticarət dövriyyəsinin 2020-ci ilin yanvar-avqust ayları ilə müqayisədə faktiki qiymətlərlə 28,3 faiz artdığı, real ifadədə 4,1 faiz azaldığı, idxalın 9,8 faiz düşdüyü, ixracın 0,1 faiz yüksəldiyi bildirilir.

Qeyri neft-qaz məhsullarının ixracında faktiki qiymətlərlə 37,4 faiz, real ifadədə 24,3 faiz artım qeydə alındığı xəbər verilir.