Avropa Məhkəməsi Azərbaycana yeni cərimə kəsdi
Oktyabrın 14-də Avropa İnsan Hüquqları Məhkəməsi Azərbaycanla bağlı yeni qərar açıqlayıb. Aihmaz.org bildirir ki, qərar Demokratiya və İnsan Haqları Resurs Mərkəzi ilə həmin qurumun sədri Əsabəli Mustafayevin şikayətlərinə əsaslanır. Ərizəçilər 2014-cü ildə bank hesablarının dondurulması kontekstində mülkiyyət və səmərəli müdafiə vasitələrinə malik olmaq hüquqlarına müdaxilədən şikayət edib. Azərbaycandan çıxışı yasaqlanan Əsabəli Mustafayev hərəkət azadlığı hüququna müdaxilə məsələsini də qaldırıb.
Şikayətləri araşdıran Avropa Məhkəməsi ərizəçilərin Avropa İnsan Hüquqları Konvensiyası ilə tanınan mülkiyyət, səmərəli müdafiə vasitələrinə malik olmaq, hərəkət azadlığı, hüquqlarla bağlı məhdudiyyətlərdən istifadənin hədləri hüquqlarının pozulduğu qənaətinə gəlib. Qərara əsasən, Azərbaycan dövləti ümumilikdə 24900 avro təzminat ödəməlidir.
Fransanın Strasburq şəhərində yerləşən, hakimləri Avropa Şurasına üzv ölkələrdən seçilən Avropa Məhkəməsi Avropa İnsan Hüquqları Konvensiyasına riayət olunmasına nəzarət edir.
Azərbaycan 1949-cu ildə yaradılmış Avropa Şurasına 2001-ci ildə qoşulub, 2002-ci ildən Avropa Məhkəməsinin yurisdiksiyasındadır.
