Yeni fondun statusu
Novator.az İqtisadiyyat Nazirliyinin tabeliyində yaradılan Azərbaycan Biznesinin İnkişafı Fondu publik hüquqi şəxsin statusuna nəzər salıb.
Fond prezident İlham Əliyevin 11 oktyabr 2021-ci il fərmanı ilə İqtisadiyyat Nazirliyinin tabeliyində olan Sahibkarlığın İnkişafı Fondu publik hüquqi şəxsin və “Azərbaycan İnvestisiya Şirkəti” Açıq Səhmdar Cəmiyyətinin birləşmə formasında yenidən təşkili yolu ilə yaradılır. Fərmana əsasən, fond iqtisadiyyatın qeyri-neft sahələrinin inkişafını dəstəkləyir, bu sahədə fəaliyyətin stimullaşdırılmasını təmin edir, habelə sahibkarlığın inkişafına maliyyə dəstəyi göstərir.
Qurumun fəaliyyətinə ümumi rəhbərliyi və nəzarəti həyata keçirmək üçün 9 üzvdən ibarət Müşahidə Şurası yaradılır. Müşahidə Şurasının 5 üzvünü İqtisadiyyat Nazirliyi, 1 üzvünü Mərkəzi Bank, 1 üzvünü Maliyyə Nazirliyi, 1 üzvünü Əmək və Əhalinin Sosial Müdafiəsi Nazirliyi, 1 üzvünü Dövlət Turizm Agentliyi təyin edir. Sədrin təyin edilməsi iqtisadiyyat nazirinin səlahiyyətindədir.
Fondun fəaliyyətinə cari rəhbərliyi 5 üzvdən ibarət İdarə Heyəti həyata keçirir. İdarə Heyətinin üzvlərini, o cümlədən sədri iqtisadiyyat naziri təyin edir.
