Manatı qoruyan xərc
Dövlət Neft Fondu Mərkəzi Bankın 2021-ci ilin sentyabr ayında keçirdiyi valyuta hərraclarında 565,4 milyon ABŞ dolları məbləğində vəsait satıb. Rəsmi hesabat oktyabrın 12-də yayılıb.
Novator.az bildirir ki, doqquz ayın ümumi satış həcmi 4 milyard 305,4 milyon dollardır. Yanvarda fonddan 644,9 milyon dollar, fevralda 437,3 milyon dollar, martda 397,7 milyon dollar, apreldə 509,9 milyon dollar, mayda 312,7 milyon dollar, iyunda 463,6 milyon dollar, iyulda 461,6 milyon dollar, avqustda 512,3 milyon dollar alınıb.
2015-ci ilin devalvasiyaları nəticəsində dolların rəsmi qiyməti 0,7844 manatdan 1,5594 manata yüksəlib, 2016-cı ildə kurs 1,7707 manata çatıb. 2017-ci ili 1,7001 manatla yola salan dollar 2018-ci il martın 7-dən 1,7 manata təklif olunur.
Manatı qorumaq üçün Dövlət Neft Fondu 2016-cı ildə 4,9 milyard, 2017-ci ildə 3,6 milyard, 2018-ci ildə 6,5 milyard, 2019-cu ildə 6,6 milyard, 2020-ci ildə 7,3 milyard dollar sərf edib.
