“Facebook” əsirliyi baş çatdı
Azərbaycan Demokratiya və Rifah Hərəkatının sədri Qubad İbadoğlunun “Facebook” səhifəsi bərpa olunub. Novator.az-ın məlumatına görə, o, oktyabrın 11-i axşamı səhifəsində bunları yazıb: “Azərbaycan hakimiyyətinin 1 ay əvvəl girov götürüb əsirlikdə saxladığı “Facebook” səhifəmi geri qaytardıq. Bir aydır gecə-gündüz mübarizə aparırdıq, sonda qalib gəldik. Bu işdə əməyi olan dostların hamısına minnətdaram!
“Facebook” səhifəmi hakimiyyət bloklamışdı. Daxili İşlər Nazirliyinə, Baş Prokurorluğa müraciət etmişdim. Nazirlik heç nə edə bilmədiyi cavabı verdi, prokurorluqdan isə səs də çıxmadı.
Xoş görüşdük, dəyərli dostlar! Sonuncu postu doğum günündən 1 gün əvvəl, sentyabrın 11-də yazmışdım. Sizin təbriklərin əksəriyyətini oxusam da, cavab yazıb təşəkkürümü çatdıra bilmədim. Təbrikə və xoş sözlərə görə minnətdaram”.
1971-ci il təvəllüdlü Qubad İbadoğlu iqtisadçı alimdir. Uzun illər Müsavat Partiyasının öncül şəxslərindən olub. Azərbaycan Demokratiya və Rifah Hərəkatını 2015-ci ildə yaradıb.
