ADR Partiyası yaradılır
Azərbaycan Demokratiya və Rifah (ADR) Hərəkatı partiyaya çevrilmək yönündə son addıma hazırlaşır.
2015-ci ildə yaradılmış Azərbaycan Demokratiya və Rifah Hərəkatına Qubad İbadoğlu sədrlik edir. 1971-ci il təvəllüdlü Qubad İbadoğlu iqtisadçı alimdir. Uzun illər Müsavat Partiyasının öncül şəxslərindən olub.
Novator.az-ın məlumatına görə, Qubad İbadoğlu özünün “Facebook” səhifəsində yazır ki, partiyanın təsis qurultayı oktyabrın 17-si internet vasitəsilə keçiriləcək: “Bizim mübarizəmiz davam edir. Bu mübarizənin hədəfi avtoritar rejimdən demokratik idarəçiliyə keçid, ərazi bütövlüyünün tam bərpası, müstəqilliyin əbədiləşməsi, rifah və hüquqi dövlət quruculuğudur. Hər kəsə layiq olduğu həyatı rahat və təhlükəsiz, azad və firavan şəkildə yaşamaq təminatını yaratmaq ADR Partiyasının başlıca amalıdır. Bu amal uğrunda sizlərlə, sadalanan dəyərlərə sadiq olanlarla birlikdə sonadək mübarizədəyik.
17 oktyabr qurultayında ADR-in siyasi partiya formatında təşkilatlanma və hədəflər uğrunda mübarizə planı açıqlanacaq. Azərbaycanı azad, demokratik və firavan görmək istəyən hər kəsdən diqqət və dəstək gözləyirik”.
