Prezident İlham Əliyev rəqəmsallaşma, innovasiya, yüksək texnologiyalar və rabitə sahəsində idarəetmənin təkmilləşdirilməsi tədbirlərinə fərman verib. Oktyabrın 11-də imzalanan fərmana görə, Nəqliyyat, Rabitə və Yüksək Texnologiyalar Nazirliyi Rəqəmsal İnkişaf və Nəqliyyat Nazirliyi adlandırılır, qurumda bu publik hüquqi şəxslər yaradılır: İnformasiya Kommunikasiya Texnologiyaları Agentliyi; İnnovasiya və Rəqəmsal İnkişaf Agentliyi.
Başqa fərmanlara əsasən, Rəqəmsal İnkişaf və Nəqliyyat Nazirliyinin tabeliyində Azərbaycan Yerüstü Nəqliyyat Agentliyi publik hüquqi şəxs, avtomobil nəqliyyatı sahəsində sərnişin və yük daşıma xidmətlərinin keyfiyyətinin yüksəldilməsinə və innovativ həllərin tətbiqinin genişləndirilməsinə xidmət edən, eləcə də avtomobil nəqliyyatı sahəsində xidmətlərin elektron formada göstərilməsini, habelə məlumatların əlçatanlığını təmin edən “AYNA” informasiya sistemi qurulur, Dövlət Dəniz və Liman Agentliyi publik hüquqi şəxs yaradılır.
Novator.az bildirir ki, 1918-ci ildə Poçt və Teleqraf Nazirliyi yaradılıb, 1920-ci ildə Poçt və Teleqraf Komissarlığına çevrilib.
1953-cü ildə Rabitə Nazirliyi yaradılıb. 2004-cü il fevralın 20-də nazirlik Rabitə və İnformasiya Texnologiyaları Nazirliyi, 2014-cü il martın 7-də Rabitə və Yüksək Texnologiyalar Nazirliyi, 2017-ci il fevralın 13-də Nəqliyyat, Rabitə və Yüksək Texnologiyalar Nazirliyi adlandırılıb.
Dövlət başçısının digər fərmanı İqtisadiyyat Nazirliyinin tabeliyində Azərbaycan Biznesinin İnkişafı Fondu publik hüquqi şəxs yaradılmasını nəzərdə tutur.
