Mod.gov.az-ın 11 oktyabr məlumatına görə, müdafiə naziri Zakir Həsənov Hərbi Dəniz Qüvvələrinin (HDQ) komanda-qərargah təliminin gedişi ilə tanış olub. HDQ-nin komandanı kontr-admiral Sübhan Bəkirov brifinqdə məruzə edib ki, təlimdə Xəzər dənizinin Azərbaycan sektorunda enerji infrastrukturlarının mühafizə və müdafiəsi üzrə xəritə üzərində tapşırıqlar icra ediləcək.
Təlimin əsas məqsədi komandirlərin və qərargah zabitlərinin döyüşün təşkili və aparılması zamanı yaranmış müxtəlif şəraitdə çevik qərar qəbul etmə və mövcud qüvvələrin səmərəli tətbiqi üzrə praktiki vərdişlərinin təkmilləşdirilməsi, o cümlədən şəxsi heyətin bilik və bacarığının artırılmasıdır. Prosesə cəlb olunan heyət döyüş fəaliyyətləri zamanı bölmələrin fasiləsiz və qətiyyətlə idarəsi üzrə tapşırıqları icra edir.
Komanda-qərargah təlimi oktyabrın 13-də bitəcək.
