Avstriyada yeni kansler
Avstriyanın yeni kansleri Aleksandr Şallenberq oktyabrın 11-i prezident Aleksandr Van der Bellenin hüzurunda and içərək fəaliyyətə başlayıb.
Novator.az bildirir ki, koronavirus məhdudiyyətlərinə görə andiçmə mərasimi qapalı şəraitdə, jurnalistlərin iştirakı olmadan keçirilib.
1969-cu il təvəllüdlü Aleksandr Şallenberq 2019-cu il iyunun 3-dən xarici işlər naziri idi.
Hökumətin əvvəlki başçısı Sebastyan Kurts kansler postundan oktyabrın 9-da istefa verib. Siyasətçi qərarını ölkə prokurorluğunun onu, eləcə də yaxın çevrəsindəki doqquz şəxsi korrupsiya və rüşvətdə şübhəli bilərək araşdırma aparması ilə bağlayıb.
1986-cı il təvəllüdlü Sebastyan Kurts Xalq Partiyasının lideridir. O, 2017-2019-cu illərdə hökumətə başçılıq etmiş, 2020-ci ildə yenidən kansler postuna oturmuşdu.
Avstriyada hökumət parlamentin 183 yerlik aşağı palatasına seçkinin nəticələri əsasında qurulur. İndiki hökuməti Xalq Partiyası ilə Yaşıllar Partiyası formalaşdırıb.
Mənbə: Kleinezeitung.at
