Nobel sülh mükafatı jurnalistlərə verildi
2021-ci ilin Nobel sülh mükafatına jurnalistlər Dmitri Muratov və Mariya Ressa layiq görülüblər.
Novator.az-ın məlumatına görə, qaliblərin adlarını oktyabrın 8-də Norveç Nobel Komitəsi açıqlayıb.
Komitə qeyd edib ki, jurnalistlər demokratiya və davamlı sülhün bünövrəsi olan ifadə azadlığı uğrunda fəaliyyətlərinə görə Nobel sülh mükafatına layiq biliniblər.
Dmitri Muratov Rusiyanın müxalif “Novaya qazeta” qəzetinin baş redaktorudur.
1993-cü ildən çıxan “Novaya qazeta” jurnalist araşdırmaları ilə tanınır, həftənin bir, üç və beşinci günləri işıq üzü görür.
1961-ci il təvəllüdlü Dmitri Muratov “Novaya qazeta”nın yaradıcılarından biridir. O, 1995-2017-ci illərdə baş redaktor postunu tutub, 2019-cu ildə yenidən baş redaktor seçilib.
Mariya Ressa Filippin və Amerika jurnalisti kimi tanınır. O, 30 ildən çoxdur jurnalistika sahəsində çalışır, daha çox araşdırıcı jurnalist kimi ad çıxarıb.
Mariya Ressa ABŞ-ın CNN kanalının Asiyada aparıcı reportyoru, informasiya şöbəsinin rəhbəri olub.
