Şəbəkə qəzası necə yozulur?
Oktyabrın 4-də ABŞ-ın “Facebook İnc” şirkətinə məxsus “Facebook”, “İnstagram” şəbəkələrinin və “WhatsApp” messencerinin fəaliyyətinin donması nəticəsində şirkətə 100 milyon dollara yaxın ziyan dəyib. Şirkətin sahibi Mark Suxerberq isə 7 milyard dollar ziyan görüb, çünki onun ixtiyarındakı səhmlər 5 faiz ucuzlaşıb.
Bütün bunlar cəmi 6 saatlıq problemin fəsadlarıdır. Həmin saatlarda istifadəçilər “Facebook”, “İnstagram” və “WhatsApp” platformalarına daxil ola bilməyiblər.
Novator.az-ın məlumatına görə, “Facebook İnc” şirkəti bəyan edib ki, problemə konfiqurasiyada səhvən edilən dəyişiklik səbəb olub. Şirkətin data mərkəzləri arasında trafiki təşkil edən əsas şəbəkə qurğularının konfiqurasiyasında edilən dəyişiklik daxili sistem və şəbəkələrə təsir göstərib, bərpa prosesini çətinləşdirib.
“Facebook İnc” şirkətinin “Facebook” şəbəkəsində 2021-ci ilin iyun ayında da ciddi problem olmuşdu. O vaxt ABŞ, Mərakeş, Meksika və Braziliyada bəzi istifadəçilər bir neçə saat ərzində “Facebook” platformasına daxil ola bilməmişdilər. Sentyabrda isə “İnstagram”a giriş istifadəçilərin üzünə 16 saat ərzində bağlı qalmışdı.
Bəzi mütəxəssislər deyirlər ki, bunlar həm də “Facebook İnc” şirkətinin öz tabeliyindəki platformaları faktiki bir sistemdə mərkəzləşdirməsinin, trafiki təşkil edən əsas şəbəkə qurğularını bir yerə cəmləməsinin fəsadıdır. Bu qənaəti bölüşən ekspertlər “Facebook İnc” şirkətinə öz platformalarını “bir qaba” yığmaqdansa ayrı-ayrı mərkəzlərə bölməyi məsləhət görürlər.
Mənbə: Dailymail.co.uk
