Norveçin Nobel Komitəsi 2021-ci ilin Nobel sülh mükafatı laureatının adını elan etməyə hazırlaşır.

Komitə hər il dünyada sülhün inkişafına töhfə verən şəxsi və ya təşkilatı mükafatlandırır.

2021-ci ilin Nobel sülh mükafatına 329 namizəd var. Onların 234-ü fiziki şəxs, 95-i təşkilatdır.

Qaydalara görə, Norveç Nobel Komitəsi qalibin adını açıqlayandan sonra namizədliyi rədd edilənlər haqda məlumat vermir. Bu informasiyalar 50 il ərzində məxfi saxlanır. Ancaq namizədlər özləri açıqlama verə bilər.

Nobel sülh mükafatı laureatının adı oktyabrın 8-də elan olunacaq.

Novator.az saytı ABŞ-ın CNN kanalına istinadla bildirir ki, təşkilatlar arasında iki ildir koronavirus pandemiyası ilə mübarizədə olan Dünya Səhiyyə Təşkilatının, yaxud bu qurumun koronavirus peyvəndlərinin ədalətli paylanması, yoxsul ölkələrin peyvəndlə təmin olunması üçün həyata keçirdiyi COVAX layihəsinın şansı daha yüksək qiymətləndirilir.

Fiziki şəxslər arasında Rusiyanın hazırda həbsdə olan müxalif lideri Aleksey Navalnı, iqlim dəyişikliyi ilə bağlı hərəkatın məşhur nümayəndəsi, isveçli Qreta Tunberq və Yeni Zelandiyanın baş naziri Casinda Ardern ən şanslı namizədlər sayılır.

Mənbə: CNN.com