Saakaşvili qayıdış xəbəri yaydı
Oktyabrın 1-i səhər özünün “Facebook” səhifəsində məlumat yayan Gürcüstanın sabiq prezidenti, müxalif Vahid Milli Hərəkat Partiyasının qurucusu Mixail Saakaşvili ölkəsinə qayıtdığını bəyan edib.
1967-ci il təvəllüdlü Mixail Saakaşvili Gürcüstan prezidenti postunu 2004-2013-cü illərdə tutub. 2013-cü ildə ölkəsini tərk edib. Gürcüstanda ona bir neçə cinayət işi qaldırılıb, haqqında həbs hökmləri var.
2015-ci ildən Ukraynada yaşayan sabiq prezident bu ölkədə vətəndaşlıq alıb, həmin il Odessa vilayətinin qubernatoru təyin olunub.
2015-ci il dekabrın 4-də Mixail Saakaşvili Gürcüstan vətəndaşlığından məhrum edilib. Buna əsas kimi başqa ölkənin vətəndaşlığı göstərilib.
2016-cı ilin noyabrında Mixail Saakaşvili Odessa qubernatoru vəzifəsindən istefa verərək müxalifətə keçib.
2017-ci il iyulun 25-də Ukrayna prezidenti Pyotr Poroşenko onu vətəndaşlıqdan çıxarıb. Buna Mixail Saakaşvilinin vətəndaşlıq alarkən anketdə həqiqətə uyğun olmayan məlumatlar göstərməsi əsas gətirilib.
Həmin il Mixail Saakaşviliyə Ukraynada cinayət işləri qaldırılıb, ancaq onu həbs etmək mümkün olmayıb. 2018-ci il fevralın 12-də Mixail Saakaşvili ölkədən deportasiya edilib.
2019-cu ildə Vladimir Zelenski Ukrayna prezidenti seçiləndən sonra Mixail Saakaşvilinin Ukrayna vətəndaşlığı bərpa olunub.
Oktyabrın 2-si Gürcüstanda yerli özünüidarə orqanlarına seçkilər keçiriləcək. Ölkənin 64 şəhər və rayonunda merlərin, yerli məclislərin ümumilikdə 2044 üzvünün müəyyənləşməsi gözlənir.
Novator.az- ın məlumatına görə, Mərkəzi Seçki Komissiyası səsvermə hüququ olan 3 milyon 497 min 345 nəfəri qeydə aldığını açıqlayıb.
Yerli məclislərə seçkilərə 43 partiya qoşulub.
Gürcüstan parlament respublikasıdır. Hökuməti 150 yerlik parlamentə azı 76 mandat əldə edən partiya formalaşdırır. 2012, 2016 və 2020-ci illərin parlament seçkilərində Gürcü Arzusu – Demokratik Gürcüstan Partiyası çoxluq əldə edərək hökumət qurub.
