Klub reytinqi: Azərbaycan 27-ci pillədədir
Novator.az UEFA-nın klub reytinqinə nəzər salıb.
İngiltərənin başçılıq etdiyi reytinqin ilk beşliyində İspaniya, İtaliya, Almaniya və Fransa da yer alır.
Rusiya 9-cu, Ukrayna 11-ci, Türkiyə 19-cu, Azərbaycan 27-ci, Qazaxıstan 28-ci, Belarus 32-ci, Moldova 33-cü, Litva 34-cü, Latviya 37-ci, Ermənistan 43-cü, Gürcüstan 46-cı, Estoniya 49-cu pillədədir.
55 üzvü olan UEFA-nın klub turnirlərində qrup mərhələsinin iki turu geridə qalıb. Çempionlar Liqası, Avropa Liqası və Konfrans Liqasının hər birində 32 klub yarışır.
Azərbaycan Konfrans Liqasında “Qarabağ” komandası ilə təmsil olunur.
UEFA-nın klub reytinqi turnirlərdə son beş mövsümdə qazanılan əmsala əsaslanır. Təsnifat mərhələlərində qələbə 1 xal, heç-heçə yarım xal, qrup mərhələsində, 1/8 final, 1/4 final, yarımfinal və finalda qələbə 2 xal, heç-heçə 1 xaldır.
Çempionlar Liqasının qrup mərhələsi 4 bonus xalı, 1/8 finalı 5 bonus xalı, 1/4 finalı, yarımfinalı və finalı 1 bonus xalı verir.
Avropa Liqasında qrup qalibi olmağa 4 bonus xalı, qrupda ikinci yeri tutmağa 2 bonus xalı, 1/8 finala, 1/4 finala, yarımfinala və finala adlamağa 1 bonus xalı düşür.
Konfrans Liqasında qrup qalibi olmaq 2 bonus xalı, qrupda ikinci yeri tutmaq 1 bonus xalı, yarımfinal və final 1 bonus xalı qazandırır.
Toplanan xallar qitə turnirlərinə vəsiqə almış ölkə klublarının sayına bölünür və mində bir dəqiqliklə əmsal çıxarılır.
Bu mövsüm Azərbaycan 2,875 əmsal əldə edib.
