103 il, 28 baş prokuror
2020-ci il mayın 1-dən Azərbaycanın baş prokuroru postunu Kamran Əliyev tutur. Novator.az bildirir ki, o, baş prokuror vəzifəsində xidmət edən 28-ci şəxsdir.
Azərbaycanda prokurorluq orqanının əsası 1918-ci ildə qoyulub. Həmin il oktyabrın 1-də Azərbaycan Xalq Cümhuriyyəti Nazirlər Şurasının qərarı ilə Bakı Dairə Məhkəməsinin tərkibində prokurorluq yaradılıb.
1920-ci ilə qədər Xəlil bəy Xasməmmədov (iki dönəm), Fətəli xan Xoyski, Teymur bəy Makinski, Aslan bəy Səfikürdski Azərbaycan Xalq Cümhuriyyətinin ədliyyə naziri, eyni zamanda baş prokuroru olublar.
Cümhuriyyət süqut etdikdən sonra, 12 may 1920-ci ildə prokurorluq ləğv edilib.
Azərbaycan Mərkəzi İcraiyyə Komitəsinin 11 iyul 1922-ci il dekreti ilə prokurorluq yenidən yaradılıb.
1936-cı ilədək xalq ədliyyə komissarı vəzifəsini tutan şəxslər – Əliheydər Qarayev, Sergey İvanov, Bahadır Vəlibəyov, Böyükağa Talıblı (iki dönəm), Hüsü Hacıyev, Ayna Sultanova, Yaqub Məmmədov həm də baş prokuror sayılıblar.
1936-cı ilin iyul ayında prokurorluq Xalq Ədliyyə Komissarlığının tərkibindən çıxarılaraq SSRİ Prokurorluğunun tabeçiliyinə keçib.
SSRİ-nin dağıldığı 1991-ci ilədək baş prokuror postunda bu şəxslər xidmət edib: Bahadır Vəlibəyov, Ağahüseyn Əlihüseynov, Cəbrayıl Cəbrayılzadə, Xəlil Əfəndiyev, Əliabbas Əliyev, Hacı Rəhimov, Adil Babayev, Seyfulla Əkbərov, Qambay Məmmədov, Abbas Zamanov, İlyas İsmayılov, İsmət Qayıbov.
1991-1992-ci illərdə Murad Babayev, 1992-1993-cü illərdə İxtiyar Şirin, 1993-1994-cü illərdə Əli Ömərov, 1995-2000-ci illərdə Eldar Həsənov, 2000-2020-ci illərdə Zakir Qaralov baş prokuror olub.
