Sarkoziyə daha bir cəza
Parisdə islah məhkəməsi Fransanın sabiq prezidenti Nikola Sarkozini 1 il müddətinə azadlıqdan məhrum edib. Hökm sentyabrın 30-da çıxarılıb.
Cəzasını ev dustaqlığı formasında çəkməli olan Nikola Sarkozi 2012-ci ilin prezident seçkisi kampaniyasının qanunsuz maliyyələşməsində təqsirli bilinib. İttihama görə, 2012-ci ildə Nikola Sarkozinin seçki kampaniyasına 42 milyon avrodan çox vəsait sərf olunub, 22 milyon avroluq qanuni hədd aşılıb.
Novator.az bildirir ki, 1954-cü il təvəllüdlü Nikola Sarkozi Fransa prezidenti postunu 2007-2012-ci illərdə tutub.
2021-ci il martın 1-də Nikola Sarkozi başqa bir cinayət işi üzrə – korrupsiya ittihamı ilə 3 il müddətinə azadlıqdan məhrumetmə cəzasına məhkum edilib. Cəzanın 1 ili real həbs cəzası, 2 ili şərti cəzadır. Fransa qanunları 2 ildən az real həbs cəzası alan şəxsin cəzanı ev şəraitində çəkməsinə imkan verdiyi üçün Nikola Sarkozi tutulmayıb.
Mənbə: France24.com
