Rusiyada inflyasiya 2016-cı ilin rekord həddinə çatır
Rusiyanın İqtisadi İnkişaf Nazirliyi ölkədə inflyasiyaya dair hesabat açıqlayıb.
Novator.az-ın məlumatına görə, hesabata əsasən, hazırda ölkədə inflyasiya 7,26%-ə çatıb.
Dövlət Dumasına seçkidən bir həftə əvvəl inflyasiya 6,96% (Duma seçkisi sentyabrın 17-19-da keçirilib), iyun ayında isə 6,5% idi.
7,26%-lik inflyasiya 2016-cı ilin aprelindən bəri ən yüksək göstəricidir.
2016-cı ilin aprelində inflyasiya 7,3%-ə çatmışdı.
Beləliklə, hazırkı inflyasiya həddi son beş il beş ayın rekorduna çatmaqdadır.
İqtisadi İnkişaf Nazirliyinin hesabatına əsasən, son həftədə ərzaq məhsulları 0,4% bahalaşıb. Ən çox bahalaşan pomidor (10%) və xiyar (4,19%) olub. Yumurtanın qiyməti 3,5%, quş ətinin qiyməti 1,1% artıb.
Ümimilikdə il ərzində ərzaq məhsullarının qiymətində 9,41% artım qeydə alınıb.
Bu yaxınlarda Rusiya Mərkəzi Bankı uçot dərəcəsini 6,75%-ə qaldırıb. Bu, il ərzində uçot dərəcəsində beşinci artımdır.
Mərkəzi Bank 2022-ci ildə uçot dərəcəsinin 4-4,5%-ə düşəcəyini, sonra 4%-ə yaxın olacağını proqnozlaşdırır. Amma bank sonrakı mərhələlərdə uçot dərəcəsinin yenidən qaldırılacağını istisna etmir. Bank uçot dərəcəsinin artırılması qərarının iqtisadiyyatın gələcək inkişafından, habelə daxili və xarici şərtlərdən, maliyyə bazarlarının reaksiyasından asılı olduğunu bildirir.
Mənbə: Novayagazeta.ru
