Ərdoğan-Putin görüşü üç saat çəkib
Sentyabrın 29-da Soçi şəhərində Rusiya prezidenti Vladimir Putinlə Türkiyə prezidenti Rəcəb Teyyub Ərdoğan arasında danışıqlar olub.
Danışıqlar təxminən üç saat çəkib.
Prezidentlər ticarət-iqtisadi əlaqələri, Cənubi Qafqazda, Suriya, Liviya, Əfqanıstanda vəziyyəti müzakirə ediblər.
Vladimir Putin danışıqların məzmunlu keçdiyini bildirib. O, iki ölkə arasında ticarət dövriyyəsinin son 9 ay ərzində 55 faizdən çox artdığını, Türkiyənin Rusiya iqtisadiyyatına 1,5 milyard dollar, Rusiyanın isə Türkiyə iqtisadiyyatına 6,5 milyard dollar sərmayə yatırdığını bildirib.
Rusiya prezidenti “Türk axını” boru xəttinin və “Akkuyu” Atom Elektrik Stansiyasının (AES) inşasını iki ölkə arasında əməkdaşlığın müsbət göstəricisi kimi qiymətləndirib.
Vladimir Putin tərəflərin Suriya və Liviyada vəziyyətlə bağlı uğurlu qarşılıqlı fəaliyyət göstərdiklərini də qeyd edib.
Putin Qarabağda atəşkəsə nəzarət üzrə Rusiya-Türkiyə Birgə Monitorinq Mərkəzinin fəal işlədiyini, sabitliyə və sülhə yönəldilmiş gələcək addımlara dair mövqelərin razılaşdırılmasının ciddi əhəmiyyətə malik olduğunu da vurğulayıb.
Rəcəb Teyyub Ərdoğan danışıqların məhsuldar keçdiyini söyləyib. O, ölkəsində baş vermiş təbii meşə yanğınlarının söndürülməsində rusiyalı mütəxəssislərin rolunu qeyd edib, turizm sahəsində əlaqələrin genişləndiyini, “Akkuyu” AES-in birinci blokunun gələn il işə salınacağını bildirib.
Suriya probleminin həllində iki ölkənin əməkdaşlığının əhəmiyyətini vurğulayan Ərdoğan bu regionda sülhün bərqərar olmasının Türkiyə-Rusiya münasibətlərindən asılı olduğunu deyib.
Qeyd edək ki, bu, Rəcəb Tayyib Ərdoğanın prezident vəzifəsində Rusiyaya 13-cü səfəridir.
