Naxçıvanda nə qədər maaş alırlar?
Naxçıvan Muxtar Respublikasının Dövlət Statistika Komitəsi bildirir ki, 2021-ci ilin yanvar-avqust aylarında bölgədə 1,8 milyard manatlıq, 2020-ci ilin eyni dövrü ilə müqayisədə 0,7 faiz çox ümumi daxili məhsul istehsal olunub. Hər bir nəfərə düşən ümumi daxili məhsulun həcmi 4066,4 manat göstərilir.
Hesabata görə, 2020-ci ilin səkkiz ayına nəzərən sənayedə 0,9 faiz, sərmayə qoyuluşunda 0,4 faiz, kənd təsərrüfatı məhsulları istehsalında 3,2 faiz, informasiya və rabitə xidmətlərinin dəyərində 7,2 faiz, kredit məbləğində 22,3 faiz artım qeydə alınıb.
Muxtar respublikada 384 növdə məhsul istehsal olunduğu, 108 ərzaq, 242 qeyri-ərzaq məhsuluna tələbatın tam yerli imkanlar hesabına ödəndiyi vurğulanır.
Statistikaya əsasən, avqustun 1-nə muxtar respublika iqtisadiyyatında bir işçiyə hesablanmış orta aylıq əməkhaqqı 544,1 manat olub.
Novator.az diqqətə çatdırır ki, rəsmi hesabata görə, avqustun 1-nə Azərbaycanda muzdlu işçilərin orta aylıq nominal əməkhaqqı 728,5 manat olub.
Ölkədə minimum maaş 250 manatdır.
Əmək və Əhalinin Sosial Müdafiəsi Nazirliyinin hesabatına görə, 2021-ci ilin əvvəlinə muzdla çalışanların yarısı 343 manatdan çox, yarısı həmin məbləğdən az əməkhaqqı alıb.
