Rusiya seçkisinin nəticələri rəsmiləşir
Sentyabrın 24-də Rusiyanın Mərkəzi Seçki Komissiyası parlamentin aşağı palatasına – Dövlət Dumasına seçkinin ilkin nəticələrini rəsmən bəyan edib.
Novator.az bildirir ki, sentyabrın 17-19-da keçirilmiş ümumxalq seçkisində 450 nəfərlik Dumanın 225 deputatı partiya siyahıları (proporsional sistem) üzrə, 225 deputatı dairələrdən (majoritar sistemlə) mandat alıb.
İlkin rəsmi nəticələrə görə, hakim Vahid Rusiya Partiyası ümumilikdə 324 yerə sahib çıxır.
Kommunist Partiyası 57, Ədalətli Rusiya Partiyası 27, Liberal Demokrat Partiyası 21, Yeni Adamlar Partiyası 13, Vətən Partiyası, Vətəndaş Platforması Partiyası, Yüksəliş Partiyası 1 mandat götürür.
5 deputat yerini müstəqil namizədlər alır.
Mənbə: Ria.ru
Rusiya Konstitusiyasına görə, baş naziri, baş nazirin müavinlərini və federal nazirləri prezidentin təqdimatı ilə Dövlət Duması təyin edir.
Hakim Vahid Rusiya Partiyasına Təhlükəsizlik Şurası sədrinin müavini Dmitri Medvedyev liderlik edir.
Dmitri Medvedyev 2008-2012-ci illərdə Rusiya prezidenti postunu tutub.
İndiki dövlət başçısı Vladimir Putin 1999-cu il avqustun 16-da baş nazir olub, dekabrın 31-dən həmçinin prezident vəzifəsini icra edib. 2000 və 2004-cü illərdə prezident seçilib.
2008-ci ildən baş nazir kürsüsündə əyləşib, 2012 və 2018-ci illərin prezident seçkilərində qalib gəlib.
