Kommunistlər Moskvadakı elektron səsvermənin nəticələrini tanımırlar
Rusiyada 17-19 sentyabrda parlamentin aşağı palatasına – Dövlət Dumasına keçirilən seçkinin ilkin nəticələri açıqlanandan sonra seçkidə iştirak edən Kommunist Partiyasının məsul şəxsləri bəyanatlarla çıxış ediblər.
Novator.az-ın məlumatına görə, partiyanın sədr müavini Dmirtri Novikov sentyabrın 20-də mediaya açıqlamasında deyib ki, Kommunist Partiyası paytaxt Moskvada keçirilən elektron səsvermənin nəticələrini tanımır: “Moskva üzrə elektron səsvermənin nəticələrini tanımırıq və tanımayacağıq da”.
Kommunist Partiyası sədrinin digər müavini Vladimir Kaşin partiyanın seçkinin rəsmi nəticələrinə qarşı aksiyalar keçirmək niyyətində olduğunu vurğulayıb. O, sentyabrın 25-də və oktyabrın 3-də aksiyaların keçirilməsi üçün aidiyyəti qurumlara rəsmən müraciət etdiklərini deyib.
Komminist Partiyasının sədri Gennadi Züqanov seçkinin nəticələrindən ümumən razı qaldığını bildirib. Saxtakarlıqlara gəlincə, o, partiya tərəfdarlarını seçkinin həqiqi nəticələrini “Podolsk kursantları Moskvanı müdafiə etdikləri kimi müdafiə etməyə” çağırıb.
Seçkinin ilkin rəsmi nəticələrinə görə, Kommunist Partiyası Dövlət Dumasının 225 deputatının seçildiyi proporsional sistem üzrə səslərin 20%-ni qazanıb. Hakim Vahid Rusiya Partiyası isə 48,97% səslə liderdir.
Majoritar sistemə gəlincə, 225 dairənin 15-də Kommunist Partiyası, 195-də Vahid Rusiya Partiyası önə çıxıb.
Bu nəticələr Kommunist Partiyasının Dövlət Dumasında ikinci fraksiya olacağından xəbər verir.
Mənbə: Echo.msk.ru
